"Volkswagen" группын хууран мэхлэлтийн хэрэг илэрснээр лхагва гарагт тус компанийн Гүйцэтгэх захирал Мартин Винтеркорн огцорлоо. Тус компанийн мэдээлснээр өнгөрсөн онд Германы хамгийн өндөр цалинтай Гүйцэтгэх захирлын жагсаалтын хоёрдугаарт бичигдэж байсан Мартин Винтеркорн удирдах тушаалаас буухдаа 32 сая ам.долларын тэтгэвэр авах төлөвтэй байгаа аж. Энэхүү үйл явдлын дараахан Германы дэд Канцлер хэвлэлд хандаж мэдэгдэл хийжээ. Винтеркорны ажлыг хэн үргэлжлүүлэх талаар тус компанийн удирдах зөвлөл баасан гарагт хэлэлцэх товтой байна. "Volkswagen"-ийг цаашид хэн тэргүүлэхээс үл хамааран 22 тэрбум ам.доллараар унасан зах зээлийн үнэлгээг эргэн сэргээх, хэрэглэгчдийн итгэлийг эргүүлэн олж авах зэрэг хүндхэн даалгавар удирдлагын нуруун дээр бууж байгаа аж. Түүнчлэн АНУ-ын Байгаль орчин хамгааллын агентлагаас "Volkswagen"-ийн АНУ-ын зах зээлд гаргасан 480 мянга гаруй дизель хөдөлгүүрт автомашин зөвшөөрсөн хэмжээнээс 40 дахин өндөр хорт хий ялгаруулж байна гэж тооцоолжээ. Үүнтэй холбоотойгоор хүний эрүүл мэндэд хохирол учруулсан хэргээр ихээхэн хэмжээний торгууль ногдуулж болзошгүй байна. Учир нь автомашины ялгаруулсан азотын исэл агаар дахь бусад химийн элементтэй урвалд орсноор багтраа, уушигны өвчин үүсгэх аюултай юм. Түүхэн баримтаас харахад АНУ-ын Засгийн газар автомашины хорт хий ялгаруулалтын түвшинд анх шалгалт хийж эхэлсний дараахан үйлдвэрлэгчид заль хэрэглэж эхэлжээ. 1970-аад онд л гэхэд хууль хэрэгжүүлэгчдийн шалгалтад ашигладаг температур хэмжигч ойртоход хий ялгаруулалтыг бууруулдаг систем ашиглагдаж байсан аж. АНУ-ын Автомашины аюулгүй байдлыг хангах төвийн тэргүүн хэлэхдээ "Шалгалтын үр дүнд нөлөөлөх систем үргэлж л байсан. Харин "Volkswagen" урьд өмнө байгаагүй нарийн бүтэцтэй мэхлэлтийн систем бүтээсэн" гэж байсан юм. Мөн энэ нь "Volkswagen"-ийн нэр холбогдсон анхны хууран мэхлэлтийн хэрэг биш гэдгийг дурджээ. Тухайлбал 1973 онд АНУ-ын хууль хэрэгжүүлэгчид "Volkswagen" компани автомашиндаа шалгалтын багийнхныг мэхлэх систем суурилуулсныг илрүүлсэн байна. Тухайн үед "Volkswagen"-ийн удирдлага гэм буруугаа хүлээн зөвшөөрч, 120 мянган ам.долларын торгууль төлж байжээ.

Б.Дашням

Холбоо барих: dashnyam.b@bloombergtvmongolia.com

minjma.g@bloombergtvmongolia.com