Ирэх зургаадугаар сард гадаад улс орноос 2000 орчим иргэнээ татан авна гэж Улсын онцгой комисс мэдэгдлээ. Тухайлбал: хамгийн эхэнд зургаадугаар сарын 10-ны өдөр Казахстанаас иргэдээ татна. Дараа нь зургаадугаар 11-нд Токио, 15-нд Дели, 18-нд Сөүл, 19-нд Франкфурт чиглэлд тусгай үүргийн нислэг үйлдэнэ.

Мөн зургаадугаар сарын 17-нд БНСУ-аар дамжин өнгөрөх нислэгээр Зүүн Өмнөд Азиас иргэдээ татан авахаар болсон байна. Түүнчлэн сонгуулийн дараа буюу зургаадугаар сарын 25, 28-ны өдөр хоёр нислэг үйлдэхээр төлөвлөөд байгаа бөгөөд чиглэл нь одоогоор тодорхойгүй байна.

Энэ долоо хоногт ОХУ-аас татан авсан иргэдээс “COVID-19”-ийн нийт 38 тохиолдол бүртгэгдээд байна. Ингэснээр Монгол Улсад шинэ төрлийн "коронавирус"-ийн батлагдсан тохиолдол 179 болж нэмэгдээд байгаа юм.

Хилийн хязгаарлалт тогтоосноос хойш буюу нэгдүгээр сарын 29-ний өдрөөс хойш нийт 8498 иргэнийг гадаадаас татан авсан гэж Улсын онцгой комисс мэдээллээ. Үүний 41 хувь нь тусгай үүргийн нислэгээр иржээ.

Түүнчлэн халдвартай хүмүүсийн татан авсан иргэдэд эзлэх хувь нэмэгдсээр байна. Тухайлбал: “COVID-19”-ийн анхны тохиолдол бүртгэгдсэн гуравдугаар сард нийт 11 хүн халдвар авсан нь батлагдсан бол нэг сарын дотор 2.5 дахин нэмэгдэж, тавдугаар сард дахин 5.2 дахин өсжээ.

Б.Төгсбилиг | @TugsbiligB

Холбоо барих: tugsbilig.b@bloombergtvmongolia.com

minjma.g@bloombergtvmongolia.com