“Turquoise Hill Resources” компани санхүүгийн тайлангаа танилцууллаа. II улиралд тус компани 402 сая ам.долларын орлоготой ажиллажээ. Орлого нь өмнөх оны мөн үеэс 21.9 хувиар өссөн ч оны эхний хагас жилийн байдлаар зургаан хувиар буурч, 804.7 сая ам.доллар болсон байна.

Түүнчлэн цэвэр ашиг нь II улиралд өмнөх оны мөн үеэс 27 хувиар буурч, 93.3 сая ам.доллар болжээ. “Оюутолгой” төслийн үйлдвэрлэл буурч, баяжмал дахь зэс, алтны агуулга буурсан нь ашиг орлого нь буурахад нөлөөлсөн байна.

“Оюутолгой” төслийн ил уурхайгаас олборлосон зэсийн хэмжээ өнгөрсөн оны мөн үетэй харьцуулахад 17 хувиар буурчээ. Харин алтны агуулга өмнөх жилээс нэлээд бага буюу 2021 онд 0.5 хувь байсан бол 0.26 хувь хүрснийг тодотгож байна.

“Оюутолгой” төслийн гүний уурхайн “Панель 0”-ийн анхны тогтвортой үйлдвэрлэл 2023 оны эхний хагаст эхлэх төлөвтэй хэвээр байгааг “Оюу Толгой” компани мэдээллээ. Харин “Панель 1” болон “Панель 2” -ын судалгааны ажлыг 2023 оны эхний хагаст дуусгахаар төлөвлөж байна.

С.Өнөрсайхан | @unursaikhan_sor

Холбоо барих: unursaikhan.s@bloombergtvmongolia.com

minjma.g@bloombergtvmongolia.com