“SouthGobi Resources” компанийн охин компани “SouthGobi Sands”-ийн ерөнхийлөгч бөгөөд гүйцэтгэх захирлаар С.Энх-Амгаланг томилсон байна. Тэрбээр энэ сарын 15-наас ажлаа хүлээн авсан талаар тус компанийн Төлөөлөн удирдах зөвлөлийн дарга Kay Priestly мэдээллээ. “SouthGobi Sands”-ийн шинэ гүйцэтгэх захирлын хувьд, өмнө нь “Нью Ком” группын охин компани болох “Clean Energy” компанийн Салхитын цахилгаан станцын төслийг удирдан ажиллаж байснаас гадна “MCS” группт ажиллаж байсан туршлагатай нэгэн аж. Харин хамгийн сүүлд “Нордстар Ресурс” болон “М-Си-Эс Петро Монголиа” компанийн гүйцэтгэх захирлаас гадна “Энержи Ресурс” компанийн Корпорацийн хөгжил хариуцсан дэд ерөнхийлөгчийн албыг хашиж байжээ. Түүнчлэн шинэ гүйцэтгэх захирлын талаар “SouthGobi Resources”-ийн ерөнхийлөгч бөгөөд гүйцэтгэх захирал Росс Троманс “Манай хамт олон С.Энх-Амгалантай хамтран ажиллаж түүний удирдах чадвар болон туршлагад түшиглэн компанийн нөөц бололцоог бүрэн ашиглаж, үйл ажиллагаагаа улам сайжруулахын төлөө ажиллахад бэлэн байна” хэмээн онцолсон байна.

“Prophecy Coal” компани зээлийн хугацаагаа гурван сараар хойшлуулжээ

Торонтогийн хөрөнгийн биржид бүртгэлтэй “Prophecy Coal” компани “Waterton Global Value” компанитай байгуулсан барьцаат зээлийн гэрээгээ дахин шинэчлэх асуудлаар хэлэлцээ эхлүүлснээ өнөөдөр мэдээллээ. Энэхүү гэрээг “Prophecy Coal” компани өнгөрсөн оны долдугаар сарын 16-наас мөрдөж эхэлсэн байна. Гэрээ ёсоор нэг жилийн дараа буюу энэ сарын 16-нд төлөх ёстой байсан зээлийн хугацааг ирэх аравдугаар сарын 31 болгон хойшлуулжээ. Түүнчлэн нийт 10 сая ам.долларын зээлээс эхний ээлжинд 3.5 саяыг нь бэлэн мөнгөөр төлөх юм байна.

Э.Нарантунгалаг

Холбоо барих: Narantungalag.e@bloombergtvmongolia.com

Tsatsralt.b@bloombergtvmongolia.com