Европын эрх баригчид хөл хорио, хязгаарлалтын арга хэмжээг зогсоохдоо ямар шат дараатай алхам хийхээ судалж эхэллээ. Харин АНУ-ын Калифорни муж эдийн засгаа үйл ажиллагаанд эргэн оруулах төлөвлөгөөгөө танилцуулсан байна.

АНУ-ын хэмжээнд шинэ төрлийн “коронавирус”-ийн халдварын тохиолдол 4.6 хувиар нэмэгдэж, 613 мянга хүрчээ. Сүүлийн нэг долоо хоногт энэ үзүүлэлт дунджаар 6.8 хувиар нэмэгдсэн байна. Өөрөөр хэлбэл тус улсад “COVID-19”-ийн тархалтын эрч суларч байгаа аж. Хэдий тийм боловч Нью-Йоркт шинэ төрлийн “коронавирус”-ийн халдварын улмаас нас барсан хүний тоо 10 мянга давжээ.

АНУ-ын Ерөнхийлөгч Дональд Трамп
“Бид тулаандаа ялж байна. Бид ойрын хугацаанд сайн мэдээнүүд дуулгана. Америкчууд маш сайн байгаа. Хэрэв бид арга хэмжээнүүд аваагүй байсан бол яах байсан бол? Бид зөв алхмууд хийсэн. Одоо эдийн засгаа үйл ажиллагаанд эргэн оруулах шаардлагатай байна” гэж мэдэгдлээ.

Харин Испани, Германд халдварын шинэ тохиолдлын тоо буурсан бол Италийнх нэг сарын доод түвшиндээ хүрлээ. Их Британид нас баралт 770 гаруйгаар нэмэгдэж, 12.1 мянга хүрсэн байна. Тус улс хөл хориогоо хэр хугацаагаар сунгахаа хэлэлцэж байгаа аж.

Үүнээс гадна вакцин үйлдвэрлэлээр тэргүүлэгчдийн тоонд ордог Францын “Sanofi” болон Их Британийн “GlaxoSmithKline” компаниуд хүчээ нэгтгэхээр болжээ. Эдгээр компаниуд шинэ вакцины хүн дээр хийх туршилтыг энэ оны хоёрдугаар хагаст явуулж, амжилттай болбол ирэх оны хоёрдугаар хагаст хэрэглээнд нэвтрүүлэхээр төлөвлөж байгаа юм байна.

Дэлхийн хэмжээнд шинэ төрлийн “коронавирус”-ийн халдвар авсан 1.9 сая, нас барсан 126.6 мянган тохиолдол бүртгэгдээд байна. Харин эдгэрсэн хүний тоо 478.5 байна.

Япон улсын Сангийн сайд Асо Таро
“Эдийн засагт үзүүлж буй шинэ төрлийн “коронавирус”-ийн нөлөөг бууруулах болон эдийн засгийг үйл ажиллагаанд эргэн оруулах нь чухал байна. Энэ чиглэлд “Их 7”-ийн орнууд хамтарч ажиллах зөвшилцөлд хүрсэн. Нэг талаас энэ оны хоёрдугаар хагаст халдвар аажмаар буурч дэлхийн эдийн засгийн үйл ажиллагаа эргэн сэргэнэ гэж харж байна. Хэдий тийм боловч ямар ч үед тодорхойгүй байдлын эрсдэл маш өндөр байгаа учраас цаг хугацааны хувьд халдварын тархалтын нөлөөг анхааралтай ажиглах шаардлагатай байна” гэсэн байна.

АНУ-ын Халдварт өвчин судлалын институтийн тэргүүн Энтони Фаучи
“Бид эдийн засгийн үйл ажиллагааг хэзээ эргэн эхлүүлбэл аюулгүй вэ гэдэг нь вирусээс хамаарна. Гэхдээ энэ нь тодорхой газруудын хувьд. Хэвлэлийн хурал хийх бүрд АНУ-ын үзүүлэлт маш огцом нэмэгдэж байгаа талаар ярьж байна. Нью-Жерсигийнх огцом нэмэгдэж байна. Одоо араас нь Бостон, ДС нэмэгдэж байна. Харин бусад муж, хотууд арай өөр дүр зураглалтай байгаа. Тэдгээр газруудад огцом өсөлт ажиглагдаагүй байж болно. Эдийн засгийн үйл ажиллагааг эргэн эхлүүлэх эсэх нь нөхцөл байдалд хэр сайн хяналт тавьж чадахаас шалтгаална. Бид дотроо түгшиж байгаа. Хэдий тийм боловч нэг тодорхой зүйл нь арга хэмжээгээ султгавал халдвар нэмэгдэнэ. Халдвар ийм л байдаг” гэж онцоллоо.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com