“Samsung Electronics” компани “Alibaba” групптэй түншлэлийн гэрээ байгууллаа. Ингэснээр БНХАУ дахь “Samsung Pay”-ийн хэрэглэгчид өөрсдийн “Galaxy S7”, “Galaxy S7 Edge” гар утаснуудаа ашиглан “Alipay” үйлчилгээнд нэвтрэх боломжтой болж байгаа юм. Энэ талаар “Samsung Electronics” компаниас мэдээллээ. Тус компани “Alipay”-ийн 450 сая хэрэглэгчээр дамжуулан БНХАУ дахь зах зээлээ тэлэхээр зорьж байна. Харин “Alibaba”-ийн хувьд энэ нь хилийн чанадад үйл ажиллагаагаа тэлэх боломж болж байгаа юм. Өнгөрсөн сард “Alipay” үйлчилгээг Европт нэвтрүүлж, энэ оны эхээр “Uber Technologies”-ийн зүгээс БНХАУ-ын хэрэглэгчдийг унааны хөлсөө “Alipay” үйлчилгээгээр төлөх боломжийг нээлттэй болгосон аж. Одоогоор “Alipay” үйлчилгээгээр БНХАУ-ын онлайн төлбөр тооцооны 58 хувийг хийж байгаа гэж “Credit Suisse”-ээс мэдээлжээ. Түүнчлэн БНХАУ-ын Интернэт сүлжээний мэдээллийн төвөөс мэдээлснээр 358 сая гаруй хятад хүн ухаалаг гар утсаа ашиглан төлбөр тооцоо хийж байгаа ажээ.

Т.Элиса

Холбоо барих: elisa.t@bloombergtvmongolia.com

minjma.g@bloombergtvmongolia.com