БНСУ-ын “Samsung Electronics” компани "Автомашины сэлбэг үйлдвэрлэлийн шинэ нэгж" байгууллаа. Автомашин үйлдвэрлэгчдийн дунд ухаалаг автомашин үйлдвэрлэх өрсөлдөөн өрнөж байгаа энэ үед “Samsung Electronics” компани жолоодлого, мэдээлэл, програм хангамжийн чиглэлд анхаарч ажиллахаар төлөвлөжээ. Энэ нь авто сэлбэгийн салбарт эзлэх хувь хэмжээгээ нэмэх, мөн жил ирэх тусам өсөлт нь буурч байгаа ухаалаг гар утас, телевиз үйлдвэрлэлийн бизнесээ орлуулах зорилготой юм байна. “Samsung Electronics” компани чип, дэлгэц үйлдвэрлэлээр тэргүүлэгчдийн нэгд тооцогддог. Энэ ч утгаараа шилдэг бүтээгдэхүүнүүдээ нэг нэгжийн дор нэгтгэх нь зах зээлд давуу тал бий болгоно гэж салбарын шинжээчид харж байна. “HMC Investment Securities” байгууллагын хийсэн судалгаагаар ухаалаг автомашины зах зээлийн 30 хувийг хагас дамжуулагч, мэдрэгчийн сэлбэг хэрэгсэл бүрдүүлнэ гэсэн тооцоо гарсан байдаг. Түүнчлэн автомашины хагас дамжуулагчийн зах зээл 2016 онд 32.7 тэрбум ам.доллар болж өсөх төлөвтэй байгаа юм.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com