Тансаг зэрэглэлийн хуучны автомашины зах зээлд үнийн өсөлтөөр “Porsche” брэндийн автомашинууд өрсөлдөж эхэлсэн байна. Автомашины даатгалын “Hagerty” компанийн тооцоолсноор 1974-1977 онд үйлдвэрлэсэн “Porsche 911” загварын дундаж үнэ 2014 онд 154 хувиар өсч, бусад брэндүүдийг ардаа орхижээ. Тодруулбал 20-30 жилийн өмнө 30 мянган ам.доллараар авч байсан “Porsche” брэндийн автомашин одоо 150 мянган ам.доллараар үнэлэгдэх боломжтой гэсэн үг юм. Хэдий тийм боловч Италийн “Ferrari” брэнд үнийн өсөлтөөр хуучны автомашины зах зээлд тэргүүлэгч хэвээр байна. 2015 онд Хойд Америкт худалдаалагдсан хамгийн үнэтэй 10 автомашины 7 нь энэ брэндэд харьяалагдаж байгаа юм. 12 дугаар сарын 10-нд Нью-Йорк хотноо болсон дуудлага худалдаагаар 1956 онд үйлдвэрлэсэн “Ferrari 290 MM” загвар 28 сая ам.доллараар зарагдсан байна. Ерөнхийдөө хуучны тансаг зэрэглэлийн автомашинууд 2007 онд дунджаар 600 мянган ам.долларын үнэтэй байсан бол өнөөдрийн байдлаар 2.6 сая ам.доллар болж, өсөөд байгаа юм. Түүнчлэн Хойд Америкт дуудлага худалдаагаар зарагдсан сонгодог автомашины борлуулалт 2015 онд 1.3 тэрбум ам.долларт хүрч, өнгөрсөн оноос 11 хувиар өсчээ.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com