(Bloomberg) -- БНХАУ-ын орон сууцны үнийн уналт есдүгээр сард өмнөх сарынхаас удаан байсан байна. Энэ нь сүүлийн үеийн шинэ арга хэмжээнүүд үр дүнгээ өгч, хүнд байдалд орсон үл хөдлөх хөрөнгийн зах зээл нь сэргэх эргэлтийн цэгтээ ойртож байж болзошгүй гэх хүлээлтийг нэмэгдүүллээ.

Төрөөс татаас олгодог орон сууцыг хассан тооцооллоор БНХАУ-ын 70 хотод шинэ орон сууцны үнэ наймдугаар сард өмнөх сараас 0.17 хувиар буурч байсан бол есдүгээр сард 0.14 хувиар буурсныг БНХАУ-ын Үндэсний статистикийн товчоо мэдээлжээ.

Харин Төрийн оролцоо харьцангуй бага байдаг хуучин орон сууцны үнэ 0.26 хувиар буурсан байна.

БНХАУ-ын эрх баригчид өнгөрсөн сард зах зээлийг дэмжих шинэ арга хэмжээнүүдийг зарласнаас хойш бага зэрэг сэргэлт ажиглагдсаныг “Citigroup” банк зэрэг зах зээлийн зарим шинжээч онцоллоо. Хэдий тийм боловч эдгээр арга хэмжээг сарын сүүл үед зарласан тул сүүлийн дата үзүүлэлтэд  үндэслэн сэргэж байна гэж дүгнэхэд эрт байна гэж тодотгожээ.