(Bloomberg) -- Одоо үргэлжилж буй Эль-Ниньо үзэгдэл нь өмнөх тохиолдлуудаар бүртгэгдсэн далайн усны температурын дээд түвшнийг давах төлөвтэйг НҮБ-ын Дэлхийн цаг уурын байгууллагаас анхаарууллаа. Ингэснээр дэлхийн эдийн засгийн чухал бүс нутгуудад хэт халалт, ердийнхөөс хуурай эсвэл чийглэг уур амьсгал зонхилж болзошгүй байна.

Энэ зун Эль-Ниньогийн үеэр далайн усны температур хэвийн хэмжээнээс хоёр хэмээр өндөр байса аж. Судлаачид оны сүүлийн гурван сард энэ нь 3.7 хэмээр давж болзошгүй гэж тооцоолжээ.

Температурын зөрүү хоёр хэмээс давах үед Эль-Ниньог маш хүчтэй гэж ангилдаг. 2015-2016 онд тохиосон хамгийн хүчтэй Эль-Ниньогийн үеэр далайн усны температур 2.6 хэмээр нэмэгдэж байжээ.

БНХАУ-ын судлаачид 2023 онд тооцоолсноор дээрх үзэгдэл дараагийн гурван жилд дэлхийн эдийн засаг бараг дөрвөн их наяд ам.долларын боломжит үйлдвэрлэлээ алдахад хүргэхээр байгаа аж.

Эль-Ниньо тохиосон жилүүдэд дэлхийн жилийн дундаж температур шинэ дээд түвшинд хүрэх хандлагатай байдгийг Дэлхийн цаг уурын байгууллагын Ерөнхий нарийн бичгийн дарга Селесте Сауло дурджээ.

Европын Холбооны дэлхийн ажиглалтын хөтөлбөр болох Коперникийн уур амьсгалын өөрчлөлтийн албаны мэдээллээр 2026 онд дэлхийн дундаж температур хоёр жилийн өмнө тогтоосон түүхэн дээд түвшнийг давах магадлал 26 хувьтай байна.