Банкны системийн хэмжээнд эрчим хүчний үр ашгийг нэмэгдүүлэх зээлийн үлдэгдэл сүүлийн зургаан жилд 34 дахин өссөн байна. Энэ оны II улирлын байдлаар банкны системийн хэмжээнд 2.9 их наяд төгрөгийн ногоон зээл олгосон байгаагаас 1.56 их наяд төгрөг нь эрчим хүчний үр ашгийг нэмэгдүүлэх зээл байна.

Энэ төрлийн зээл 2023 оноос эрчимтэй тэлж, зөвхөн нэг улиралд 80 гаруй хувиар өсөж, 188 тэрбум төгрөг давсныг Монголбанк мэдээлж байв.

Энэхүү өсөлт Монголын эрчим хүч хэмнэх зохицуулалтаас гадна олон улсын ногоон санхүүжилтийн эх үүсвэр нэмэгдсэн нь давхцаж байна. Тодруулбал: 2023 оны тавдугаар сард Европын Сэргээн Босголт, Хөгжлийн Банк Хасбанктай 25 сая ам.долларын санхүүжилтийн багц байгуулсан. Мөн 2023 оны долоодугаар сард Европын Сэргээн Босголт, Хөгжлийн Банк болон “Уур амьсгалын ногоон сан” хамтран 137 сая ам.долларын “GEFF Mongolia” хөтөлбөрийг эхлүүлсэн юм.

Харин 2024 оноос эрчим хүчний тарифын шинэчлэл, хомсдолтой холбоотой сорилтууд нэмэгдэж буй. 2024 оны 11 дүгээр сараас цахилгааны дундаж тариф 216-аас 280 төгрөг/квт.ц болж, өрхийн хэрэглээнд шаталсан тариф нэвтрүүлээд байна.

Ногоон зээлийн бүтэц салбаруудад жигд бус байгааг Монголбанк тодотгож байв. Эрчим хүчний үр ашиг, ногоон барилга, хэрэглэгчийн эрчим хүчний хэмнэлттэй бүтээгдэхүүнүүдийг бодлогын хүрээнд тэргүүлэх чиглэл болж байгааг онцолж байна.