(Bloomberg) -- ОХУ-ын Ерөнхийлөгч Владимир Путин Төрийн телевизэд ярилцлага өгөх үедээ Ираны зөрчил бүрэн намжсаны дараа АНУ Украины дайныг эцэслэх асуудлаар үргэлжлүүлэн хэлэлцэнэ гэсэн хүлээлттэй байгаагаа мэдэгджээ.

“Бид хэлэлцээг үргэлжлүүлж, нарийн деталиуд болон хэрэгжүүлэх механизмын талаар ярилцахад бэлэн байна. Тохиролцоонд хүрдэггүй юм аа гэхэд ядаж өнгөрсөн жил Анкорижид хэлэлцсэн сэдвүүдийг үргэлжлүүлэх боломжтой” хэмээн Владимир Путин онцолсон байна.

Мөн тэрбээр ОХУ-д шатахууны нийлүүлэлтийн асуудал үүсээд байгааг хүлээн зөвшөөрч, энэ хүрээнд дизель түлшний экспортыг бүрэн хориглох хүртэлх арга хэмжээг судалж байгааг мэдээлжээ.

Он гарсаар Украины зэвсэгт хүчин ОХУ-ын эрчим хүчний дэд бүтцийг онилсон халдлагаа эрчимжүүлээд буй. Энэ амралтын өдрүүдэд Краснодар мужийн Славянск-на-Кубани газрын тос боловсруулах үйлдвэрт дроноор цохилт өгснийг Украины Ерөнхийлөгч Владимир Зеленский мэдээлсэн юм. Цохилтын улмаас өдөрт 100 мянган баррель газрын тос боловсруулах хүчин чадалтай үйлдвэрт гал гарч, цахилгаан дамжуулах шугам болон хийн дэд бүтэц гэмтжээ.

Украины халдлагуудын улмаас ОХУ-ын бүс нутгуудын 75 орчим хувьд шатахууны хязгаарлалт тогтоох, эсвэл нийлүүлэлтийн тасалдал үүсэх нөхцөл бүрдээд байна. ОХУ-д автобензиний нөөц 1.7 сая тонн хүрсэн нь өмнөх оны мөн үеэс дөрвөн хувиар буурсан үзүүлэлт юм.