Нийслэлийн төсвийн алдагдал улсын нэгдсэн төсвийн алдагдлаас 3.3 дахин давсан, жилд 4-5 удаа тодотгол хийж байгаа зэрэг нь нийслэлийн төсвийн тогтвортой байдал алдагдах эрсдэлийг нэмэгдүүлж байна.

Үнэт цаас, бонд болон гадаад эх үүсвэрээр санхүүжүүлж буй төслүүдийн эргэн төлөлт нь цаашид улс, нийслэлийн төсөвт нэмэлт дарамт учруулах эрсдэлтэй байгааг Ерөнхий хяналтын сонсголын дүгнэлтэд тодотгосон юм.

Нийслэлээс хэрэгжүүлж буй хөрөнгө оруулалтын томоохон төслүүдийн төлөвлөлт хангалтгүй. 16 мега төслийн нийт төсөвт өртөг 28.9 их наяд төгрөг хүрсэн боловч санхүүжилтийн гүйцэтгэл ердөө таван хувьтай байгааг сонсголын үеэр мэдээлжээ.

Үүнээс гадна нийслэлийн өмчит байгууллагын тоо чиг үүргийн давхардал нэмэгдсэн нь засаглалын эрсдэл үүсгэж буйгаас гадна хувийн хэвшлийн өрсөлдөөний орон зайг хязгаарлаж байна.

Мөн нийслэлийн худалдан авах ажиллагаа, урьдчилгаа санхүүжилттэй холбоотой ноцтой эрсдэл илэрсэн аж. Тухайлбал: Туулын хурдны замын төсөлтэй холбоотойгоор 500 тэрбум төгрөгийн урьдчилгааг эргэлзээтэй баталгаагаар олгосон. Ингэснээр найман хүн яллагдагчаар татагдаж, 2.6 их наяд төгрөгийн гүйлгээг хязгаарласан талаар мэдээлэв.

Цаашид нийслэлийн төсвийн сахилга бат, тогтвортой байдлыг хангах чиглэлд эрх зүйн зохицуулалтыг боловсронгуй болгох, иргэдийн оролцоо, ил тод байдлыг хангахад анхаарах шаардлагатай. Мега төслүүдийг нийгэм, эдийн засгийн үр өгөөж, төсөвт үзүүлэх нөлөө, эрсдэлийн үнэлгээнд үндэслэн эрэмбэлэх, худалдан авах ажиллагааны хяналтыг сайжруулах зэрэг арга хэмжээ авах зөвлөмжийг Төсвийн байнгын хорооноос гаргажээ.