(Bloomberg) -- "SpaceX"-ийн хувьцааны ханш хоёрдогч зах зээлийн арилжааны эхний долоо хоногоо өндөр өсөлттэй өндөрлүүллээ.

Пүрэв гарагт хувьцааны ханш нь 3.6 хувиар суларснаар хоёр өдөр дараалан нийт 8.3 хувиар буурсан байна. Гэсэн ч IPO-оор санал болгосон анхны үнээсээ 37 хувиар өсөж, арилжааны эхний долоо хоногийг дуусгалаа.

Ингэснээр пуужин, хиймэл дагуул, хиймэл оюуны чиглэлд үйл ажиллагаа явуулдаг "SpaceX"-ийн зах зээлийн үнэлгээ 2.4 их наяд ам.доллар хүрч, дэлхийн хамгийн өндөр үнэлгээтэй компаниудын эрэмбэд зургаадугаарт жагсаж байна.

Компани IPO-ийн үеэр санал болгосон нийт хувьцааныхаа 20 орчим хувийг жижиг хөрөнгө оруулагчдад хуваарилсан нь хувьцааны ханшийн савлагаанд нөлөөлжээ.

Хоёрдогч зах зээлийн арилжааны эхний өдрүүдэд гол худалдан авагчид нь жижиг хөрөнгө оруулагчид байсан байна. Харин лхагва гарагт тэдний идэвх суларч, арилжаа хаагдахад ердөө 2.3 сая ам.долларын худалдан авалт хийжээ.

"SpaceX"-ийн андеррайтерууд ирэх долоо хоногоос хөрөнгө оруулагчидтай уулзаж, багадаа 20 тэрбум ам.долларын бонд санал болгохоор бэлтгэж байгааг эх сурвалжууд мэдээлсэн байна. Ингэснээр "SpaceX" анх удаа ам.доллароор нэрлэсэн өндөр зэрэглэлийн бонд гаргахаар төлөвлөж байна.