(Bloomberg) -- “Samsung Electronics” компани ажил хаялтаас сэргийлж, хамгийн олон гишүүнтэй  Үйлдвэрчний эвлэлтэйгээ даваа гарагт дахин хэлэлцээ хийх гэж байна.

Хиймэл оюуны тэсрэлтээр “Samsung Electronics”-ийн санах ойн чипийн эрэлт нэмэгдэж, тус компанийн үйл ажиллагааны орлого ч эрс өссөн юм. Үүнтэй холбоотойгоор талуудын хэлэлцэх гол асуудал цалин, урамшуулал байх аж. Хэрэв тохиролцоонд хүрч чадахгүй бол Үйлдвэрчний эвлэл тавдугаар сарын 21-ний өдрөөс эхлэн 18 хоног ажил хаяж, жагсахаа мэдэгдээд буй.

“Samsung Electronics”-ийн 40 мянга орчим ажилчин гүйцэтгэлд суурилсан урамшууллыг нэмэгдүүлэх шаардлага тавин жагсаал зохион байгуулаад байгаа юм. Үйлдвэрчний эвлэл үйл ажиллагааны ашгийн 15 хувийг урамшуулалд олгох, дээд хязгаарыг цуцлахыг шаардаж байна.

Хэрэв “Samsung Electronics”-ийн чипийн үйлдвэр хаагдаж, ажилчид  нь ажил хаясан тохиолдолд нэг өдөрт эдийн засагт учруулах хохирол 668 сая ам.доллар буюу нэг их наяд воноор хэмжигдэж болзошгүйг БНСУ-ын Ерөнхий сайд Ким Мин Сог анхааруулсан байна.