“Asian Battery Metals” компани Говь-Алтай аймаг дахь зэс-алтны "Майхан уул" буюу "Red Hill" төслийнхөө өрөмдлөгийг эхлүүлснээ пүрэв гарагт зарлалаа.

Дөрөвдүгээр сарын эцсээр тус компани төслийг худалдан авах 890 мянган ам.долларын дүнтэй хэлцлийг дуусгаж, 100 хувь эзэмших болсон юм. Худалдан авалт дууссаны дараа төслийн талбайд 1500 метрийн өрөмдлөгийн хөтөлбөр даруй эхлүүлэх болохоо мэдээлж байв.

Анхны өрөмдлөгөөр харагдах байдлын хувьд зэсийн өндөр агуулга бүхий сульфидын эрдэсжилт огтолсныг “Asian Battery Metals” компанийн захирал З.Ган-Очир онцолж байна.

"Майхан уул" төслийн талбай нь компанийн гол төсөл болох зэс-никелийн "Ямбат"  талбайгаас найман километрийн зайд оршдог.