(Bloomberg) -- БНСУ-ын хувьцаанууд зах зээлийн үнэлгээгээр Их Британийг гүйцэж түрүүлэн, дэлхийн найм дахь том хөрөнгийн зах зээлд тооцогдож эхэллээ.

БНСУ-ын Хөрөнгийн биржид бүртгэлтэй компаниудын нийт зах зээлийн үнэлгээ энэ онд 45 хувь давж эрчимжиж, 4.04 их наяд ам.доллар хүрчээ. Харин ижил хугацаанд Их Британийнх гурван хувиар өсөж, 3.99 их наяд ам.доллар болсныг “Bloomberg”-ийн дата харуулж байна.

Харин 2024 оны эцсээр Их Британийн хөрөнгийн зах зээлийн үнэлгээ БНСУ-ынхаас бараг хоёр дахин өндөр байсан юм.

Хөрөнгө оруулагчид хиймэл оюунтай холбоотойгоор технологийн тэргүүлэгч компаниудын хувьцаанд төвлөрснөөр ханш нь эрчимтэй өсөхөд гол түлхэц болсон байна. Ялангуяа тус биржийн урдаа барьдаг хоёр компани болох санах ойн чип үйлдвэрлэгч “Samsung Electronics” болон “SK Hynix” энэхүү өсөлтийн хурдыг чиглүүлж буй.

800 гаруй компани бүртгэлтэй байдаг БНСУ-ын хөрөнгийн зах зээлийн жишиг “Kospi Index”-ийн нийт зах зээлийн үнэлгээний 40-өөс дээш хувийг дээрх хоёр компани дангаараа  бүрдүүлж байна.

Мөн БНСУ-ын Ерөнхийлөгч И Жэ Мёны хэрэгжүүлж буй компанийн засаглалыг сайжруулах шинэчлэл, реформ, зах зээлд ээлтэй бодлогууд нь хувьцааны үнийг дэмжих эерэг нөлөө үзүүлж буйг “JPMorgan Asset Management” онцоллоо.

Түүнчлэн энэ сард Тайванийн хөрөнгийн зах зээл Их Британийг гүйцэж түрүүлэн зах зээлийн үнэлгээгээр дэлхийд долоодугаарт эрэмбэлэгдэж эхэлсэн байна. Тайванийн жишиг индексийн үнэлгээний 45 хувийг чип үйлдвэрлэгч "Taiwan Semiconductor Manufacturing" компанийн хувьцаа бүрдүүлж байгаа аж.

Тайванийн хөрөнгийн зах зээл 4.48 их наяд ам.доллароор хэмжигдэж эхэлснээр Канадын зах зээлд дөхөж очоод байна.