Газрын тосны үнэ баррель нь 95 ам.доллар хүрэхэд шатахууны үнэ 40 орчим хувиар нэмэгдэнэ. Шатахууны үнэ нэмэгдэх нь төлбөрийн тэнцлийн алдагдлыг тэлж, төгрөгийн ам.доллартой харьцах ханш суурь төсөөллөөс дунджаар 100 орчим төгрөг, ирэх онд 150 орчим төгрөгөөр суларна. Улмаар тээвэрлэлт, үйлдвэрлэлийн зардал нэмэгдэх дам нөлөөгөөр бусад бараа, үйлчилгээний үнэ өсөж, нийт инфляц суурь төсөөллөөс энэ онд 4.4 нэгж хувиар, ирэх онд 1.4 нэгж хувиар тус тус өсөхөөр байна.

Харин 120 ам.доллар хүрч өсөх тохиолдолд шатахууны үнэ 70 гаруй хувиар нэмэгдэнэ. Мөн ам.долларын ханш суурь төсөөллөөс 160-300 төгрөгөөр суларч, бараа, үйлчилгээний үнэд дам нөлөөлснөөр инфляц суурь төсөөллөөс энэ онд 9 орчим нэгж хувиар эрчимжих эрсдэлтэй.

Хамгийн муу хувилбар буюу газрын тосны үнэ ирэх улирлуудад баррель нь 150 ам.доллар, 2027 онд 117 ам.доллар орчимд хадгалагдах үед дотоодод шатахууны үнэ 120 гаруй хувиар өсөх тооцоолол гарсан байна. Энэ нь инфляцыг суурь төсөөллөөс 13.4 нэгж хувиар өсгөхөөр байгааг тодотгожээ.

Монгол Улс ОХУ-тай байгуулсан гэрээний хүрээнд АИ-92 автобензинийг тогтворжуулсан үнээр худалдан авч байгаа юм. Харин дизель түлшний үнэ дэлхийн зах зээлийн үнийг дагаж тодорхой хэмжээгээр нэмэгдсэн.

Сүүлийн байдлаар ОХУ-аас дотоодын зах зээлийнх нь үнээр түлш худалдан авах тохиролцоо хийсэн бөгөөд ингэснээр ирэх тавдугаар сард түлш, шатахууны үнэ өсөхгүй гэдгийг Аж үйлдвэр, эрдэс баялгийн сайд мэдээлсэн юм.