АПУ ХК үндсэн бүтээгдэхүүнийх нь зах зээлд хэрэглэгчдийн худалдан авалтын чиг хандлага импортын бүтээгдэхүүн рүү шилжиж буйтай холбоотойгоор дотоодын өрсөлдөөн эрчимжиж буйг үйл ажиллагааны тайландаа онцоллоо.

2025 онд инфляц болон гадаад валютын ханшийн нөлөөлөл харьцангуй тогтвортой байсныг дурджээ. 2024 онд тус компани гадаад валютын ханшийн зөрүүнээс 1.5 тэрбум төгрөгийн алдагдал хүлээж байсан юм. Харин өнгөрсөн онд дээрх үзүүлэлтээс 1.4 тэрбум төгрөгийг ашиг олсноо мэдээлж байв. 

АПУ ХК сүү, сүүн бүтээгдэхүүний зах зээлд эзлэх хувиа өсгөх зорилгоор нэмэлт санхүүжилт татан төвлөрүүлж, үйлдвэрлэл болон дэд бүтцийн хөрөнгө оруулалтуудыг шат дараатайгаар хэрэгжүүлж байна.

Бүтээгдэхүүний өрсөлдөх чадварыг нэмэгдүүлэх, хэрэглэгчдийн хэрэгцээг илүү өргөн хүрээнд хангах зорилгоор сүү, сүүн бүтээгдэхүүний брэнд болон нэр төрлийг нэмэгдүүлэн, тасралтгүй хөгжүүлж ажиллажээ.

Гадаад зах зээл талаас харвал тус компани 10 орчим улсад экспортын үйл ажиллагаагаа тэлсэн байна. Тухайлбал: БНФУ болон БНСУ-ын сүлжээ дэлгүүрүүдээр бүтээгдэхүүнээ борлуулж эхэлснийг тодотгов.

Үүнээс гадна АПУ ХК түгээлтийн стратегийнх нь чухал зангилаа болж, нийт ачилтын 38 хүртэлх хувийг дангаараа гүйцэтгэх хүчин чадалтай гэж тооцоолж буй зүүн бүсийн автомат агуулахын төслийн бүтээн байгуулалтыг гуравдугаар сараас эхлүүлээд байна.