(Bloomberg) -- БНСУ-ын хөрөнгийн зах зээлийн жишиг “Kospi Index” дээд түвшинд хүрч өслөө. АНУ Иран энхийн хэлэлцээр байгуулах асуудалд өөдрөг хүлээлт бий болсон, мөн хиймэл оюуны салбар дахин эрчийг авах хүлээлттэй холбоотойгоор ийнхүү эрчимжсэн байна.

Өсөлтөд тус улсын “Samsung Electronics” болон “SK Hynix” зэрэг чип үйлдвэрлэгчийн хувьцааны ханшийн өсөлт гол дэмжлэг болжээ. Ингэснээр Ираны дайн эхэлснээс хойших бүх алдагдлаа нөхлөө.

“Kospi Index” индекс мягмар гарагт арилжаа нээгээд 2.2 хүртэлх хувиар өсөж, одоогийн байдлаар 6300 нэгжийг давсан хөдөлгөөнтэй арилжааг үргэлжлүүлж байна.

Технологийн хувьцаанууд жин дардаг тус  индекс энэ онд 50 гаруй хувиар эрчимжсэнээр дэлхийн хэмжээнд хамгийн өндөр гүйцэтгэлтэй зах зээлүүдийн нэг болоод байгаа юм.

Үүнээс гадна батлан хамгаалах болон эрчим хүчний тоног төхөөрөмжийн эрэлт, түүнчлэн хувьцаа эзэмшигчдийн өгөөжийг сайжруулах, компанийн засаглалыг бэхжүүлэх БНСУ-ын Засгийн газраас хэрэгжүүлж буй кампанит ажил 3.8 их наяд ам.долларын үнэлгээтэй тус улсын  хөрөнгийн зах зээлийн өсөлтийг дэмжиж байна.