(Bloomberg) -- “JPMorgan Chase”-ийн арилжаалагчид I улирлын хамгийн өндөр орлоготой тайлангаа танилцууллаа. Энэ удаад тус компани өмнөх амжилтаа бараг хоёр тэрбум ам.доллароор давуулсан байна. Нийт арилжааны орлого нь 11.6 тэрбум ам.доллар хүрч, өмнөх оны мөн үеэс 20 хувиар өсжээ.

Банкны арилжааны нэгжүүд бүгд шинжээчдийн таамгийг давсан үзүүлэлттэй улирлыг дуусгасан байна. Харин хувьцаа нь өчигдрийн арилжаагаар 0.8 хувиар буурчээ.

“Citibank” ч мөн адил зах зээлийн савлагааг ашиглаж, арилжааны орлогоо нэмэгдүүлсэн байна. Тус банкны тогтмол орлоготой хэрэгслийн арилжааны нэгж 5.2 тэрбум ам.долларын орлоготой байсан нь 13 хувиар өссөн үзүүлэлт болов. Түүнчлэн хувьцааны арилжааны орлогоо 39 хувиар нэмэгдүүлж, 2.1 тэрбум ам.доллар хүргэснээр санхүүгийн хямралаас хойших дээд амжилтаа тогтоогоод байгаа юм. Даваа гарагийн арилжаагаар “Citibank”-ийн хувьцааны ханш 2.6 хувиар өсжээ.

Харин “Wells Fargo”-ийн орлогын гол эх үүсвэр болох цэвэр хүүгийн орлого шинжээчдийн таамгаар 12.3 тэрбум ам.доллартой тэнцэж байсан ч 12.1 тэрбум ам.доллар гэж тайлагнажээ. Үүний дараа тус банкны хувьцааны ханш 4.8 хувиар буурсан байна.