Хиймэл оюуны эдийн засгийн үр өгөөжийн 75 хувийг салбарын компаниудын ердөө 20 хувь нь хүртэж буйг “PwC”-ийн шинэ тайланд онцоллоо.

Дэлхийн хэмжээний тус судалгаа нь 25 салбарын, гол төлөв Хөрөнгийн биржид бүртгэлтэй томоохон компаниудын 1200 гаруй удирдах албан тушаалтныг хамруулжээ. Хиймэл оюуныг хэрхэн нэвтрүүлсэн, үүнээс олж буй орлого, үр ашгийн өсөлт зэрэг талаар оролцогчдоос асуусан байна.

Тэргүүлэгч компаниуд дан ганц бүтээмж бус, өсөлтдөө ч анхаарч байгааг тайланд дурджээ.

Түүнчлэн эдгээр компани нь өсөлтийн боломжийг олж илрүүлэх, хянах, бизнесийн загвараа шинэчлэхдээ хиймэл оюун ухааныг ашиглах магадлал бусад компаниудаас ойролцоогоор 2-3 дахин өндөр байна. Ингэснээр салбарын тэргүүлэгч компаниуд болон туршилтын шатандаа гацсан дийлэнх бизнесүүдийн хооронд ихээхэн ялгаа үүссэнийг тайланд онцоллоо.