Өнгөрсөн оны зунаас хойш махны үнийн өсөлт инфляцад сар бүр илүү өндөр нөлөө үзүүлж байгаа бөгөөд гуравдугаар сард улсын хэмжээнд инфляцын түвшин 7.4 хувьтай гарснаас 2.1 нэгж хувийг нь махны үнийн өсөлт бүрдүүлсэн байна.

Малын тоо толгой хорогдож, цөөрснөөр махны үнэ эрчимтэй өсдөг. Тухайлбал: 2025 онд махны үнэ 20.1 хувиар өссөн нь 2018 оноос хойших хамгийн өндөр үзүүлэлт болсон юм.

Covid-19 цар тахлаас хойш Монгол Улсын нийт малын тоо толгой буурсаар байгаа бөгөөд 2022 оны оргил үед 71.1 сая толгой хүрсэн бол 2025 оны эцэст 58.1 сая болжээ.

2023-2024 оны зудын улмаас зүй бусаар хорогдсон малын тоо толгой эрс нэмэгдэж, нийт 14.3 сая толгой мал хорогдсон. Харин 2025 онд харьцангуй тогтворжиж, 0.8 хувиар нэмэгджээ.

Малын тоо толгой хорогдохтой зэрэгцээд хөдөө аж ахуйн салбар өнгөрсөн жилүүдийг тааруу үзүүлэлттэй өндөрлүүлж, 2023 онд 8.9 хувиар, 2024 онд 28.7 хувиар агшжээ. Малын тоо толгой цөөрснөөр сүү, ноос, ноолуур зэрэг бүтээгдэхүүний үйлдвэрлэл эрс буурч, салбарыг доош нь татдаг.