“S&P Global Ratings” агентлагаас дөрөвдүгээр сард Ираны дайн намжиж, Ормузын хоолой нээгдэх төлөвтэй ч зарим доголдол хэдэн сар үргэлжлэх магадлалтайг анхаарууллаа.

Персийн булангийн хамтын ажиллагааны зөвлөлийн зарим улсын Төв банкнаас дайны үр дагаврыг даван туулахад зориулсан арга хэмжээ авахаа зарласан байна. Тухайлбал: Арабын Нэгдсэн Эмират, Кувейт, Катар зэрэг улсын Төв банк арилжааны банкнуудын хөрвөх чадварыг нэмэгдүүлж, заавал байлгах хөрөнгийн хэмжээнд уян хатан нөхцөлөөр хангахаар шийдвэрлэжээ.

Эдгээр арга хэмжээ нь банкнуудад дахин санхүүжилтийн боломж олгож, үргэлжлүүлэн зээл нийлүүлэхэд туслах аж.

Түүнчлэн эдгээр улсын Засгийн газруудын хувьд банкны системээ дэмжих хангалттай нөөцтэй. Өмнөх хямралуудын үеэр ч их хэмжээний туслалцаа үзүүлж байсан юм. Жишээлбэл: Үндэсний баялгийн томоохон сан бүхий Кувейт улсын хөрвөх чадвар өндөртэй хөрөнгийн хэмжээ дотоодын нийт бүтээгдэхүүнээс нь зургаа дахин өндөр байгаа аж.

Одоогоор “S&P Global Ratings” агентлагаас бүс нутгийн банкнуудын зээлжих зэрэглэлийг өөрчлөх шаардлагагүй гэж үзсэн байна. Эрсдэл нэмэгдэж, ашигт ажиллагаа буурахаар байгаа ч бодлогын хүү төсөөлснөөс бага хувиар буурчээ.

Мөн Засгийн газраас  хангалттай дэмжлэг авч байгаа тул банкнуудын төлөвийг тогтвортой хэвээр үлдээх нь зүйтэй гэж тайлбарласан юм.