(Bloomberg) -- “Samsung Electronics” компани Вьетнамд үйл ажиллагаагаа өргөжүүлж, чип савлагааны үйлдвэр байгуулахад дөрвөн тэрбум ам.долларын хөрөнгө оруулалт хийхээр төлөвлөж байна.

Үйлдвэрийн бүтээн байгуулалтыг тус улсын хойд бүсийн Тхай Нгуен мужид үе шаттайгаар хэрэгжүүлэх  ба эхний шатанд хоёр тэрбум ам.доллар зарцуулна. Одоогоор тус төслийн хамтын ажиллагааны харилцан ойлголцлын санамж бичиг боловсруулах ажил хийгдэж буйг Вьетнамын Сангийн яам мэдэгджээ.

“Samsung Electronics” 2008 онд Вьетнамд анхны үйлдвэрээ байгуулж байсан бөгөөд түүнээс хойш олон улс дахь хамгийн томд тооцогдох гар утас үйлдвэрлэлийн бааз нь болж хөгжөөд буй.

Олон улсын компаниуд БНХАУ-аас үйлдвэрлэлээ төрөлжүүлж, АНУ-тай үүссэн худалдааны зөрчлөөс үүдэх эрсдэлийг бууруулах стратеги барьж буй үед Ази тивд хамгийн хурдацтай өсөж буй эдийн засгуудын нэг болох Вьетнам улс нь үйлдвэрлэлээ тэлэх томоохон төвд тооцогдож байна.

2024 оны байдлаар “Samsung Electronics” компани тус улсад 23.2 тэрбум ам.долларын хөрөнгө оруулж, 90 мянган ажлын байр бий болгожээ.