(Bloomberg) -- Энэ сард инфляцыг хяналтдаа оруулах алхмаас хоцрохгүйн тулд Японы Төв банк бодлогын хүүг нэмэгдүүлэх магадлалтайг тус банкны Гүйцэтгэх захирал асан Масааки Каизүка “Bloomberg”-т өгсөн ярилцлагадаа онцоллоо.

Тэрбээр Японы Төв банкны байр сууринд байсан бол одоо арга хэмжээ авах цаг нь болсон гэдгийг тодотгосон байна. Мөн Ойрх Дорнодын дайн эдийн засгийн орчинд дарамт үүсгэж буй үед хэрэглээний үнийн индекс хүлээлтээс давж огцом өсөж эхэлбэл бодлогын хариу арга хэмжээ авахад оройтох эрсдэлтэйг дурджээ.

Иран АНУ-ын талууд гал зогсоох тохиролцоонд хүрч, газрын тосны үнийн өсөлт намжаад байна. Хэдий тийм боловч дайн эхлэхээс өмнөх үетэй харьцуулахад дээгүүр түвшинд байгаа нь зардал өсөхөд нөлөөлж, Японы эдийн засагт дарамт болох төлөвтэй байгаа аж.

Дөрөвдүгээр сарын 28-нд мөнгөний бодлогын ээлжит хурлын шийдвэрийг танилцуулахаас өмнө Японы Төв банкны тэргүүн Казүо Үэда бодлогын хүүгийн шийдвэртэй холбоотой урьдчилсан дохио өгөх эсэхийг зах зээлийн шинжээчид анхааралтай ажиглаж байна.