Пянз, кассет тоглуулагч, дижитал аппарат зэрэг "үеэ өнгөрөөсөн" бүтээгдэхүүнүүд залуу хэрэглэгчдийн дунд эргэн хүчээ авах давлагааг 2026 онд утастай чихэвч үргэлжлүүлж байна.

“Circana” судалгааны фирмийн сүүлд гаргасан тайланд мэдээлснээр утастай чихэвчний борлуулалт таван жил дараалан буурсны дараа гэнэт эрчтэй сэргэж, 2025 онд зах зээлдээ эзлэх хувь нь гурван хувиар өсөөд зогсохгүй 2026 оны гурван сард борлуулалт нь 20 гаруй хувиар цойлсон байна.

10 гаруй жилийн өмнө “Apple” компанийн "Airpods" зах зээлд анх нэвтрэх үед TWS буюу утасгүй "bluetooth" технологиор холбогддог чихэвч яваандаа уг зах зээлийн үндсэн бүтээгдэхүүн болж, AUX болон USB оролтоор холбодог хямд төсөр чихэвч хэдэн жилийн дараа хэрэглээнээс бүрэн гарна гэсэн төсөөлөл давамгайлж байлаа.

Гэтэл ретро бүтээгдэхүүний тренд, алдартнуудын нөлөөлөл гэсэн энгийн хоёр хүчин зүйл дээрх чиг хандлагыг ийнхүү эргүүлжээ. Лили-Рөүз Депп, Пол Мескал, Белла Хадид зэрэг алдартнууд нь утасгүй чихэвчний трендийн түүчээлэгчид болохыг “The Guardian” онцолсон байна. Мөн “Vogue” сэтгүүл “Apple”-ийн “Earpods”-ийг гоёлын аксесуар байдлаар ашигласан зургийг шинэ дугаарынхаа нүүрэнд тавьснаар уг трендэд улам эрч нэмжээ.

Үүнээс гадна бага наснаасаа компьютер, ухаалаг утас зэрэг орчин үеийн технологиудыг хэрэглэж дассан "Gen Z" үеийнхний хувьд дижитал бүтээгдэхүүн зөвхөн дэвшилтэт, хэрэгцээтэй байх бус "хэрэгцээтэй, хөгжөөнтэй, гоё харагддаг" байх нь чухал болсныг БНХАУ-ын "36Kr" медиа компани нийтлэлдээ онцолжээ.