"Баян Хөндий" төслөөсөө алт олборлож эхлээд байгаа “Erdene Resource Development” компани хөгжүүлэлтээс үйлдвэрлэл рүү шилжсэний дараах анхны тайлангаа танилцууллаа.

2025 оны есдүгээр сард олборлолтоо эхлүүлсэн тус компани нийт 7434 унц алтыг унц тутамд 4187 ам.долларын дундаж үнээр борлуулж, дайвар түүхий эд болох мөнгөний борлуулалтыг нэгтгэсэн дүнгээр 31 сая ам.долларын нийт орлоготой ажилласан байна.

Өндөр агуулга бүхий "Баян Хөндий" орд нь жилд 650 мянган тонн хүдэр боловсруулж, 85 мянган унц хүртэлх алт үйлдвэрлэх хүчин чадалтай. Төслийн гарц өнгөрсөн оны 12 дугаар сард нийт хүчин чадлынхаа 88 хувьд хүрсэн нь "Хөндий" эрдсийн дүүрэгт өртөг багатай үйлдвэрлэлийн бааз суурь байгуулах “Erdene Resource Development”-ийн стратегийн эхэн шатны зорилтууд биелж буйг харууллаа. Өсөлтийн энэ үе шатанд тус компанийн цэвэр алдагдал өмнөх онтой харьцуулахад ялимгүй буурч, 8.18 сая ам.доллароор хэмжигджээ.

"Баян Хөндий" төсөлтэй зэрэгцэн “Erdene Resource Development” зэс-молибденийн томоохон төсөл хөгжүүлж буй. Ойролцоо байршилтай "Зуун мод" ордын молибденийн баттай болон бодит нөөц шинэ тооцооллоор 22 хувиар өсөж, 333 сая фунт болсон бол зэсийн нөөц нь 16 хувиар өсөж, 384 сая фунт хүрснийг тайландаа мэдээлжээ.