(Bloomberg) -- Японы бүх төрлийн бараа, бүтээгдэхүүний экспорт хоёрдугаар сард өмнөх оны мөн үеэс 4.2 хувиар өссөнийг тус улсын Сангийн яам мэдээллээ. Нэгдүгээр сард 17 орчим хувиар эрчимжиж байсантай харьцуулахад өсөлтийн хурд нь огцом удааширчээ.

Харин шинжээчдийн медиан таамаг болох 1.9 хувийн өсөлт үзүүлнэ гэсэн төсөөллөөс давсан байна.

Тайлант хугацаанд Японоос АНУ-д нийлүүлэх автомашины тээвэрлэлтэд тарифын дарамт нөлөөлжээ. Мөн Сар шинийн баярын амралтын үеэр БНХАУ-д эрэлт суларсан нь экспорт удаашрах гол шалтгаан болсон байна. Гадаад худалдааны статистикаас харахад АНУ-д нийлүүлэх автомашин өнгөрсөн сард үнийн дүнгээр 14.8 хувиар доошилсноор тус улсад хийсэн экспорт найман хувиар буурахад гол жин дарсан байна.

Мөн БНХАУ дахь экспорт 10.9 хувиар буурчээ. Хагас дамжуулагч үйлдвэрлэлийн тоног төхөөрөмж, хуванцар бүтээгдэхүүн болон оптикийн тоног, төхөөрөмжийн нийлүүлэлт хоёр оронтой тоогоор буурсан нь нэлээд түлхэц болжээ.

Харин Европын Холбооны орнууд руу чиглэсэн экспорт 14 хувиар өссөн байна. Үүнд автомашин болон барилга, уул уурхайн салбарт ашиглагддаг машин механизмын экспорт эрчимжсэн нь дэмжлэг болсон аж.

Тайлант хугацаанд импорт нь өмнөх оны мөн үеэс 10.2 хувиар эрчимжсэнээр Японы худалдааны тэнцэл хоёрдугаар сард 57.3 тэрбум иений ашигтай гарсан байна.