Бага дүнтэй, өдөр тутмын төлбөр тооцоонд бэлэн мөнгө нь чухал үүрэгтэй хэвээр байгааг Монголбанкны судлаачид мэдээллээ. Бэлэн мөнгөний хэрэглээний түүвэр судалгаагаар иргэдийн 28 хувь нь “Бэлэн мөнгө огт авч явдаггүй” гэж хариулжээ.

Медиан дүнгээр өдрийн эхэнд 10 мянган төгрөг авч явж,  ойролцоогоор 16 мянган төгрөгийг бэлнээр зарцуулдаг байна. Өөрөөр хэлбэл ихэнх иргэн бага хэмжээний бэлэн мөнгө ашигладаг бол цөөн хэсэг нь их дүнтэй мөнгө биедээ авч явдагтай холбоотойгоор бэлэн мөнгөний хэрэглээ дунджаар өсжээ.

Сүүлийн жилүүдэд карт, шилжүүлэг, ухаалаг хэтэвч зэрэг бэлэн бус төлбөр эрчимтэй нэмэгдэж байгаа ч бэлэн мөнгөний гүйлгээний дундаж дүн бэлэн бус төлбөрийн дунджаас дөрөв дахин өндөр хэвээр байна.

Ялангуяа тэтгэврийн насныхан болон хувиараа хөдөлмөр эрхлэгчдийн дунд бэлэн мөнгөний хэрэглээ харьцангуй өндөр байдаг аж. Нийт хэрэглээ нь голчлон жижиг дүнтэй гүйлгээнд төвлөрч буйг Монголбанкны судалгаанд дурджээ.

Өнгөрсөн оны 11 дүгээр сард гүйлгээнд байгаа бэлэн мөнгөний хэмжээ 10 жилийн өмнөх үетэй харьцуулахад 1.7 дахин нэмэгдсэн байна. Харин энэ оны хоёрдугаар сарын байдлаар нийт 1.4 их наяд төгрөгийг бэлнээр гүйлгээнд гаргасныг Үндэсний статистикийн хороо мэдээлсэн юм.