Хонконгийн Хөрөнгийн биржид бүртгэлтэй “Mongolian Mining Corporation” компани 2025 оны цэвэр ашиг нь 90 гаруй хувиар буурахаар байгааг анхааруулсан ч хувьцааны ханш нь өсөлттэй хэвээр байна. Тухайлбал: энэ он гарсаар “Mongolian Mining Corporation”-ийн хувьцааны ханш 18 гаруй хувиар өсөөд байгаа юм. Энэ нь хөрөнгө оруулагчид тус компанийн урт хугацааны өсөлтөд итгэлтэй байгааг харуулж байна.

2025 онд “Mongolian Mining Corporation” компанийн цэвэр ашиг 5-15 орчим сая ам.долларын түвшинд байхаар байгааг “Bloomberg Intelligence” таамаглаж байна. Оны эхний хагас жилд өндөр дүнгээр унасан тус компанийн нүүрсний бизнес оны хоёрдугаар хагасаас тогтворжсон байх магадлалтайг Эндрю Чен онцоллоо.

Мөн тус компани хугацаа нь 2026 онд дуусах байсан бондынхоо өр төлбөрөө эрт барагдуулсан зэрэг нь хөрөнгө оруулагчдын итгэлийг нэмэгдүүлж байна.