Хонконгийн Хөрөнгийн биржид бүртгэлтэй “Mongolian Mining Corporation” компанийн 2025 оны ашиг хүлээлтээс тааруу байх өндөр магадлалтай байгааг “Bloomberg Intelligence”-ийн Эндрю Чен мэдээллээ.

Коксжих нүүрсний үнэ өнгөрсөн оны хоёрдугаар хагаст эхний хагас жилтэй харьцуулахад сул байсан нь үүнд нөлөөлнө гэж үзсэн байна. Мөн санхүүгийн үзүүлэлтэд алтны үйл ажиллагаа нь дорвитой нөлөөлөх цаг хараахан ирээгүй гэж үзжээ. Хэдий тийм боловч тус компанийн бэлэн мөнгөний урсгал хангалттай хэвээр, 2026 онд үйл ажиллагаа нь 2025 оноосоо харьцангуй сайн байна гэж “Bloomberg Intelligence” таамаглалаа.

Монгол Улсаас БНХАУ-ын импортолсон нүүрсний үнэ тонн нь 82 ам.доллароос 76 ам.доллар болж буураад байгаа ч тус компанийн 50 хувийг эзэмшдэг “Баян хөндий” төслийн үйлдвэрлэл өнгөрсөн оны IV улирлаас эхлээд байна. Ингэснээр “Mongolian Mining Corporation” зөвхөн алтны бизнесээс жилд 150 сая ам.долларын хүү, татвар, элэгдэл, хорогдлын өмнөх орлого төвлөрүүлж чадна гэж үзжээ.

Ялангуяа 2030 онд тус компанийн 350 сая ам.долларын бондын хугацаа дуусахаас өмнө санхүүгийн нөөцөө хангалттай сэргээхэд тусална гэж таамаглаж байна.