Монголын Хөрөнгийн биржид бүртгэлтэй компаниуд 2025 оны цэвэр ашгаас хувьцаа эзэмшигчдэдээ ногдол ашиг тарааж эхлээд байна.

Одоогийн байдлаар “Дэвшил мандал” болон “Оллоо” ХК ногдол ашиг тараахгүй байх шийдвэр гаргаад байгаа бол “Мандал даатгал” нэгж хувьцаанд 14 төгрөгийн ногдол ашиг тараахаар шийдвэрлэжээ.

Дээрх шийдвэрээс хойш тус компанийн хувьцааны ханш 24 хувиар өссөн хөдөлгөөнтэй байна. Өнгөрсөн оны III улирлын байдлаар “Мандал даатгал” компанийн цэвэр ашиг 11.3 хувиар өсөж, 8.1 тэрбум төгрөг хүрснийг тайлагнасан юм.

2025 онд нээлттэй компаниуд нийт 1.1 их наяд төгрөгийн ногдол ашиг тараасан бөгөөд үүний талаас дээш хувийг банкнууд бүрдүүлжээ. 2025 оны эцэст банкнуудын ашигт ажиллагаа буурсан нь энэ онд ногдол ашгийн хэмжээ төдийлөн өсөхгүй гэсэн хүлээлт бий болгоод байна.

Төлөөлөн Удирдах Зөвлөлийн шийдвэрийн хугацааг харвал дийлэнх компани хоёрдугаар сарын дундуур ногдол ашгийн шийдвэрээ гаргадаг. Харин энэ оны хоёрдугаар сарын дундуур Сар шинийн баярын бүх нийтийн амралтын өдөр тохиож байгаа тул дараа долоо хоногийн эцэс гэхэд дийлэнх шийдвэрүүд нийтлэгдэх магадлалтай байна.