2026 онд Нийгмийн даатгалын сангийн чөлөөт үлдэгдлээс Засгийн газрын урт хугацаат бонд болон Төв банкны үнэт цаас худалдан авалтад зарцуулах хөрөнгийн дээд хэмжээг 300 тэрбум төгрөгөөр тогтоолоо.

Хуульд зааснаар сангийн хөрөнгийг эрсдэл багатай хөрөнгө оруулалтад байршуулахыг зөвшөөрдөг. Мөн Нийгмийн даатгалын үндэсний зөвлөлийн саналыг Засгийн газраар батлуулж, Засгийн газрын үнэт цаас болон Монголбанкны үнэт цаасанд байршуулж болохоор зохицуулсан байдаг.

Одоогийн байдлаар Засгийн газрын олон улсын зах зээлд гаргасан ам.долларын бондын өгөөж 4.6-5.8 хувь орчим байгаа бол дотоод үнэт цаасны хүүгийн түвшин хугацаанаас хамааран 10.1-13.3 хувь байна.

2026 онд Засгийн газраас үнэт цаас гаргалтаа эрчимжүүлж буй бөгөөд оны эхний улирал дуустал 40 тэрбум төгрөгийн бонд гаргах хуваарьтай байна.

Харин Төв банкны үнэт цаасны хүү бодлогын хүү буюу 12 хувьтай тэнцэж байгаа ч сүүлийн найм орчим жилийн хугацаанд зөвхөн дөрвөн долоо хоногийн богино хугацаат үнэт цаасыг арилжаалжээ.

Өнгөрсөн онд нийгмийн даатгалын сангийн чөлөөт үлдэгдлээс 700 тэрбум төгрөгийг томоохон банкнуудад 14.1 хувиар байршуулж байсан юм.