2025 онд айл, өрхүүд үнийн өсөлтөөс шалтгаалан жилийн дүнгээр өмнөх оноос 2.5 сая төгрөгийн илүү зардал гаргасан ч энэ хэмжээгээр цалин тэтгэвэр нэмэгдээгүй байна. Иймд үнийн өсөлт нь төсвийн бодлоготой шууд холбоотой байгааг Ардчилсан намын бүлгийн зөвлөх, Эдийн засагч А.Батпүрэв тодотголоо. 

Мөн сүүлийн 10 жилийн хугацаанд зөвхөн хүнсний бүтээгдэхүүний үнийн өсөлтийн улмаас дундаж орлоготой монгол айл өрх долоон сая төгрөгийн алдагдал хүлээсэн гэсэн тооцоолол гарсныг УИХ дахь Ардчилсан намын бүлэг мэдээлэв. 

Ингэснээр айл, өрхүүд боловсрол, эрүүл мэнддээ зарцуулах мөнгөө долоон сая төгрөгөөр танаж, мөн ийм хэмжээний хадгаламж үүсгэх боломжоо алдсан гэж дүгнэсэн байна.

Үүнээс гадна дэд Сайд нарыг томилсонтой холбоотойгоор УИХ дахь Ардчилсан намын бүлгийн дарга Засгийн газрыг огцруулах бичигт гарын үсэг цуглуулж буйгаа мэдээлсэн юм. Огцруулах бичгийг өргөн барихад шаардлагатай 32 гишүүний гарын үсэг бүрдсэн бөгөөд УИХ-ын хаврын чуулганаар шийдвэрлүүлэхээр төлөвлөж байгааг онцлов.