Төрийн өмчийн компани, үйлдвэрийн газруудыг нээлттэй хувьцаат компани болгох, хувьцаа нэмж гаргах ажлын хүрээнд “Монголын цахилгаан холбоо” ХК-ийн энгийн хувьцааны 49 хүртэлх хувь, “Үндэсний давхар даатгал” ХК-ийн хувьцааны 34 хүртэлх хувийг нэмж гаргахаар төлөвлөж байна. Ингэснээр төрийн эзэмшил 51-66 хувиас багагүй байна. Хувьцааг ижил төрлийн үйл ажиллагаа эрхэлж буй олон улсын хөрөнгө оруулагчдад тэргүүн ээлжинд санал болгох аж.
Мөн “Монголын хөрөнгийн бирж” ХК-ийн төрийн эзэмшлийн хувьцааны 15 хүртэлх хувь, “Шивээ-Овоо” ХК-ийн 49 хүртэлх хувь, “Багануур” ХК-ийн 24 хүртэлх хувийн хувьцааг нэмж гаргана. Харин “Төрийн банк” ХК-ийн төрийн эзэмшлийн энгийн хувьцааг 51 хувиас багагүй хэмжээнд үлдээх бол Хадгаламжийн даатгалын корпорацийн эзэмшлийн 45 хүртэлх хувийг биржээр арилжаалахаар төлөвлөжээ.
Үүнээс гадна Хөдөө аж ахуйн корпораци ТӨХХК болон МИАТ компанийн 49 хүртэлх хувийг олон нийтэд санал болгоно. Эхний ээлжинд энгийн хувьцааны тодорхой хэсгийг стратегийн болон санхүүгийн хөрөнгө оруулагчдад санал болгох ба дараа нь хувьцаа нэмж гарган олон улсын биржээр нээлттэй худалдахаар УИХ-ын тогтоолын төсөлд тусгажээ.