(Bloomberg) – Өмнөд Солонгосын воны ханшийн уналтыг зогсоох оролдлого өдөр ирэх тусам эрчимжиж байна. Пүрэв гарагт тус улсын Сангийн яам валютын зах зээлийн тогвторгүй байдал нэмэгдэж буй тул шаардлагатай тохиолдолд шуурхай арга хэмжээ авахаа анхааруулсан. Мөн Засгийн газраас дотоодын зах зээлд ам.долларын нийлүүлэлтийг нэмэгдүүлэхийн тулд валютын зохицуулалтыг сулруулсан юм.

Энэ оны хоёрдугаар хагаст воны ханш ам.долларын эсрэг ойролцоогоор 8 хувиар суларсан. Воны ханшийн уналт үргэлжлэх нь хөрөнгө оруулалтын гадагш чиглэсэн урсгал нэмэгдэх, импортын инфляц эрчимжих эрсдэлийг нэмэгдүүлэхээс гадна Төв банкны эдийн засгийн өсөлтийг дэмжих мөнгөний зөөлөн бодлогод сорилт болж байгааг шинжээчид анхааруулж буй.

Одоогоор БНСУ-ын Үндэсний Тэтгэврийн сан нь валютын зах зээлд дэмжлэг үзүүлэх чухал хэрэгсэл хэвээр байгаа. Тус сан воны ханшийг дэмжихийн тулд өөрийн эзэмшилд буй ам.доллароо борлуулснаа мэдээлсэн. Мөн брокерын үйлчилгээ үзүүлэгч компаниуд гадаадын хувьцааны маркетингаа түр зогсоохоор шийдвэрлэжээ.

Воны ханшийн хөдөлгөөнийг харвал сүүлийн байдлаар ам.доллартой харьцах спот ханш нь 1,477-д хүрсэн нь дөрөвдүгээр сараас хойших хамгийн доод үзүүлэлт юм. Үүнтэй харьцуулахад 1997 оны Азийн санхүүгийн хямралын үеэр спот ханш “1,500”-ийн түвшинд хүрч байжээ.