(Bloomberg) -- Японы Төв банкны тэргүүн Казуо Уэда баасан гарагт мөнгөний бодлогын ээлжит хурлаараа бодлогын хүүг өсгөж, сүүлийн 30 жилийн хамгийн өндөр түвшинд хүргэнэ гэсэн хүлээлт шинжээчдийн дунд давамгайлж байна. Тодруулбал: Мөнгөний бодлогын хороо бодлогын хүүг 0.25 нэгж хувиар өсгөж, 0.75 хувь хүргэнэ гэсэн хүлээлт үүсээд байгаа юм.

Казуо Уэдаг албан үүргээ хүлээн авснаас хойш судалгаанд хамрагдсан 50 эдийн засагч анх удаа бүгд бодлогын хүүг өсгөнө гэж таамаглаж байна.

Хамгийн сүүлд Японы Төв банкны бодлогын хүүг одоогийн түвшинд байхад бондын өгөөж гурван хувь орчимд байсан юм. Бондын өгөөж дээрх түвшинд хүрвэл хөгжингүй орнууд дунд хамгийн өндөр өрийн дарамтад орсон Японы Засгийн газрын өрийн үйлчилгээний өртөг өсөж, төслийн зарцуулалтын хувилбарууд нь хязгаарлагдмал болох аж.

Энэ сард Японы Засгийн газрын 10 жилийн хугацаатай бондын өгөөж 1.97 хувьд хүрч, 18 жилийн дээд түвшинд дөхөөд байна. 

Японы Засгийн газрын эдийн засгийг дэмжих зорилтын дагуу Төв банк нь мөнгөний зөөлөн бодлого баримталбал иений ханшийн уналт үргэлжилнэ. Ингэснээр импортын бараа, бүтээгдэхүүний үнэ өсөх эрсдэлтэй юм.

АНУ-ын хөдөлмөрийн зах зээлийн статистик мэдээлэл хүлээгдэж байгаатай зэрэгцээд иений ханш сүүлийн байдлаар ам.долларын эсрэг 0.3 хувиар чангарснаар спот ханш нь 155.33 түвшинд тогтлоо.

АНУ-ын эдийн засгийн өсөлт сулрах нь иений ханш ам.долларын эсрэг чангарахад нөлөөлөх гол хүчин зүйл хэвээр буйг "Wells Fargo" мэдээлсэн юм. Энэ долоо хоногт АНУ-ын хөдөлмөрийн зах зээлийн статистик танилцуулагдсаны дараа  иений ханшийн төлөв илүү тодорхой болохыг онцолж байна.