(Bloomberg) -- “Oracle” хиймэл оюун дата төвүүд болон бусад тоног, төхөөрөмжид хийх хөрөнгө оруулалтаа нэмэгдүүлэхээ мэдээлсний дараа тус компанийн хувьцааны ханш сүүлийн 11 сарын өндөр дүнгээр буурлаа.

Тус компани өнгөрсөн улиралд дата төвийн хөрөнгө оруулалтад 12 тэрбум ам.доллар зарцуулсныг “Bloomberg” тооцоолсон байна.

Түүнчлэн 2026 оны тавдугаар сараар эцэслэх санхүүгийн жилд хөрөнгө оруулалтын зардлаа 50 тэрбум ам.доллар хүргэнэ гэж мэдээлжээ. Энэ нь есдүгээр сарын төсөөллөөс 15 тэрбум ам.доллароор давсан дүн болж байна.

“Oracle” компани их хэмжээний зардал гаргаж байгаа ч үүлэн тооцооллын нэгжийн орлого нь хөрөнгө оруулагчдын хүлээлтэд нийцэхгүй байгаа аж.

Дээрх мэдээллийн дараа пүрэв гарагт тус компанийн хувьцааны ханш Нью-Йоркийн Хөрөнгийн биржид 11 хувиар буурч, 198.85 ам.долларт хаалаа.

Есдүгээр сарын 10-нд түүхэн дээд түвшинд хүрснээс хойш лхагва гарагийн хаалтын үнээр тооцоход “Oracle” зах зээлийн үнэлгээнийхээ гуравны нэгийг алдаад байна. Үүний зэрэгцээ тус  компанийн зээлийн эрсдэлийн хэмжүүр сүүлийн 16 жилийн дээд түвшинд хүрээд байна.