Монгол Улсын Засгийн газрын олон улсын зах зээлд гаргасан бондууд 12 дугаар сарыг уналттай эхлүүлж байна.

Даваа гарагийн арилжаагаар 2027 болон 2028 онд дуусах бондуудын ханш бага зэргийн уналттай өндөрлүүлэв. Аравдугаар сарын эцэст Монгол Улсын зээлжих зэрэглэл ахисантай холбоотойгоор бондуудын ханш эрс өсөөд байсан юм. Харин сүүлийн хоёр долоо хоног гаруй хугацаанд энэ өсөлтөө бараг бүтэн алдаад байна.

Ам.долларын бондын зах зээлд хиймэл оюун, дата төв хөгжүүлэлттэй холбоотой томоохон компаниудын бонд гаргалт нэлээдгүй эрчимжээд буй нь бондын хөрөнгө оруулагчдыг татаж байгаа аж.

Ерөнхийдөө олон улсын зах зээлд Засгийн газрын бондуудыг зарах хөдөлгөөн оны сүүлийн сарын эхэнд нэлээдгүй их ажиглагдаж байгаа юм.

АНУ-ын Холбооны Нөөцийн банк бодлогын хүүгээ бууруулах төлөвтэй байгаа нь бонд гаргаж буй компаниудын хувьд санхүүгийн таатай орчин бүрдүүлж, хөрөнгө оруулагчдад өөдрөг төсөөлөл бий болгож байна.

АНУ-ын Засгийн газрын 10 жилийн хугацаатай бондын өгөөж эргэн дөрвөн хувь давж өсөөд байгаа бол Японы Засгийн газрын бондын өгөөж 2008 оноос хойших дээд түвшинд хүрээд байна.