(Bloomberg) --  Даваа гарагт “Bitcoin”-ийн ханш огцом унаснаар нэг орчим тэрбум ам.долларын хөшүүрэгтэй позицууд арчигдаад байна. Долоо хоногийн эхэнд “Bitcoin”-ийн ханш найман хувиар унаж, 83.8 мянган ам.долларын ханшид хүрсэн юм. Ингэснээр аравдугаар сарын оргил түвшнээсээ 30 орчим хувийн уналттай байна. Харин мягмар гарагт эргэн бага зэрэг сэргэж, 86.4 мянга хүрлээ.  

“Ether” ч мөн адил уналтад орж, сүүлийн хоёр сар орчмын хугацаанд ханш нь 36 хувиар буурсан дүнтэй байна.

Аравдугаар сарын эхээр  АНУ-ын Ерөнхийлөгч Дональд Трамп тарифын хувь хэмжээг нэмэгдүүлэх талаар дурдахад крипто зах зээлээс 19 тэрбум ам.долларын хөшүүрэгтэй арилжаанууд устгагдаж байсан юм.

"ETF руу орох урсгал багасаж, уналттай үед худалдан авагчгүй байгаа нь одоогийн байдлаар гол анхаарах зүйл болж байна. Дараагийн гол дэмжлэгийн түвшин 80 мянган ам.доллар байх болно" гэж крипто арилжааны “FalconX” компани мэдээлжээ.

Сүүлийн нэг сарын хугацаанд 4.6 тэрбум ам.долларын гарах урсгалтай байсан АНУ-ын ETF-үүд рүү өнгөрсөн долоо хоногт 70 сая ам.доллар орсон байна. “iShares Bitcoin Trust ETF”-ээс хөрөнгө оруулагчид таван долоо хоног дараалан хөрөнгөө татан авчээ.