(Bloomberg) -- Хагас дамжуулагч болон автомашины эрэлт хүчтэй байснаар БНСУ-ын экспорт 11 дүгээр сард тогтвортой өсөлтөө хадгаллаа.

11 дүгээр сард ажлын өдрийн зөрүүг тохируулж тооцсон дүнгээр БНСУ-ын экспорт өмнөх оны мөн үеэс 13.3 хувиар эрчимжсэнийг тус улсын Статистикийн газраас танилцуулсан байна. Аравдугаар сард 14 хувийн өсөлтөө үзүүлснийг мэдээлж байсан юм.

Тайлант хугацаанд тус улсын нийт экспорт 8.4 хувиар,  импорт 1.2 хувиар тус тус өссөнөөр худалдааны ашиг нь 9.7 тэрбум ам.доллар хүрчээ.

Хиймэл оюуны технологи болон дата төвүүдийн тасралтгүй нэмэгдэж буй эрэлтээс шалтгаалан өнгөрсөн сард БНСУ-ын хагас дамжуулагчийн экспорт өсөлтөөрөө тэргүүлж бараг 39 хувиар эрчимжсэн байна.

Мөн автомашины экспорт сэргэж, 14 орчим хувийн өсөлттэй гарч, нефть химийн зэрэг бусад салбарын уналтыг нөхөж чадсан байна.

Худалдааны статистик үзүүлэлт гарахаас хэдхэн хоногийн өмнө БНСУ-ын Төв банк бодлогын хүүг 2.5 хувьд хэвээр үлдээхээр шийдвэрлэж, 2026 оны дотоодын нийт бүтээгдэхүүний өсөлтийн төсөөллийг 1.8 хувьд хүргэж ахиулаад байгаа юм. Мөн өнгөрсөн сард АНУ-ын талтай худалдааны хэлэлцээрт хүрснээр бүх төрлийн бараа, бүтээгдэхүүнд ногдох тарифыг 15 хувь болгож бууруулаад байна.