(Bloomberg) -- АНУ-ын Ерөнхийлөгч Дональд Трамп гадаад улсад цагаачилсан АНУ-ын иргэдийг буцаан татах буюу "урвуу цагаачлал"-ын бодлого хэрэгжүүлэхийг уриалж, мөн цагаачлалыг хязгаарлах боломжит арга хэмжээнүүд танилцуулсны дотор хөгжиж буй орнуудаас цагаач иргэн хүлээн авахыг хориглох санаа багтжээ.

Тэрбээр пүрэв гарагийн орой "Truth Social" платформд оруулсан постууддаа өмнөх Ерөнхийлөгч Жо Байдены үед хүлээн авсан цагаачлалын "олон сая" өргөдлийг цуцлахаа мэдэгдэж, "АНУ-ын цэвэр хөрөнгө биш, мөн манай улсыг хайрлах сэтгэлгүй хэн бүрийг буцааж, дотоодын амар тайван байдалд саад болсон цагаачдыг иргэншлээс хасна" хэмээжээ. Мөн АНУ-ын иргэний харьяалалгүй хүмүүст төрөөс олгодог бүх тусламж дэмжлэгийг зогсоохын сацуу "Гуравдагч ертөнцийн бүх орнуудаас ирэх цагаачлалыг бүр мөсөн зогсоож, АНУ-ын тогтолцоо бүрэн сэргэх боломжийг олгоно" хэмээн нэмж дурдсан байна.

Хэдий тийм боловч Дональд Трамп эдгээр бодлого, арга хэмжээг хэрхэн хэрэгжүүлэхээр зорьж байгаа, мөн "гуравдагч ертөнцийн орон" гэсэн ангилалд ямар улсууд багтах эсэх дээр нарийн тайлбар өгөөгүй байна. "Гуравдагч ертөнцийн орон" гэдэг нь ихэвчлэн хөгжиж буй орнуудыг хамруулдаг, нарийн тодорхой бус, доромж утгатай нэршил юм.

АНУ-ын Конгресс улсынхаа цагаачлалын хуульд дорвитой шинэчлэл хийж чадаагүй олон жил болж буй. Мөн энэ чиглэлд Ерөнхийлөгч Трампын гаргасан зарим шийдвэрүүдийг шүүхээс хориглож байсан юм.