Долоодугаар сараас хойш Монголын Хөрөнгийн биржээр арилжаалагдсан уул уурхайн бүтээгдэхүүний хэмжээ энэ оны эхний хагас жилээс гурав дахин нэмэгдлээ.

2025 оны эхээр таваар тэр дундаа нүүрсний үнэ өндөр дүнгээр буурснаар худалдан авагчгүй болж, арилжаа нь царцаад байсан Уул уурхайн бүтээгдэхүүний бирж сүүлийн хагас жилд эрс сэргэсэн юм. Оны эхний зургаан сард 5.3 сая тонн уул уурхайн бүтээгдэхүүн арилжаалагдсан бол сүүлийн тав орчим сарын хугацаанд гурав дахин нэмэгдэж, 18.1 сая тонн хүрсэн байна.

Дуудлага арилжааны үнийн өсөлтөөс худалдагч компаниуд 270.1 тэрбум төгрөгийн нэмэлт орлого олсон бөгөөд энэ нь 2025 оны эхний хагастай харьцуулахад биржээр арилжаалагдсан бүтээгдэхүүний тоо хэмжээ 239 хувиар, үнийн дүн 226 хувиар өссөн үзүүлэлт гэдгийг Монголын Хөрөнгийн бирж мэдээллээ.

Нүүрсний үнэ сэргэж эхэлснээр худалдан авагчдын арилжааны идэвх эрс нэмэгджээ. Түүнчлэн Засгийн газраас хэрэгжүүлсэн бодлогын хүрээнд хувийн компаниуд биржийн арилжаанд илүү тогтмол оролцох болсон аж. Энэ оны хоёрдугаар хагас жилд нийт 16.6 сая тонн нүүрс, дөрвөн их наяд төгрөгөөр арилжаалагдсан байна.

Нүүрснээс гадна төмрийн хүдрийн арилжаа энэ онд онцлохуйц байгаа юм. Оны хоёрдугаар хагаст арилжааны хэмжээ нь багассан ч үнийн дүнгийн хувьд тогтвортой хэвээр байна.

Олон улсын зах зээлд төмрийн хүдрийн нийлүүлэлт удааширсан нь ханшид нь дэмжлэг болж байна. Хэдийгээр Монголын Хөрөнгийн биржээр арилжаалагдаж буй төмрийн хүдрийн агууламж харьцангуй бага ч 11 дүгээр сард ханш нь дангаараа дунджаар 14.9 хувиар өсөж арилжаалагджээ. Харин долоодугаар сараас хойш 1.4 сая тонн төмрийн хүдэр, 334.3 тэрбум төгрөгөөр арилжаалагдсан байна.