Монгол Улсын Тэргүүн шадар сайд бөгөөд Эдийн засаг, хөгжлийн сайдаар Ж.Энхбаярыг томилох саналыг Ерөнхий сайд Г.Занданшатар Монгол Ардын Намын бүлэгт танилцуулсныг мэдээллээ. Түүний оронд Хүнс, хөдөө аж ахуй, хөнгөн үйлдвэрийн сайдаар М.Бадамсүрэнг томилохоор танилцуулсан байна.

Ж.Энхбаяр нь УИХ, Засгийн газарт олон жил ажилласан туршлагатай бол М.Бадамсүрэн Дорнод аймгийн Засаг даргаар гурван удаа томилогдон ажиллаж, 2024 оноос УИХ-ын гишүүнээр сонгогдсон.

Үүнээс гадна Монголбанкны Ерөнхийлөгчөөр “Эрдэнэс Монгол” нэгдлийн Гүйцэтгэх захирлаар ажиллаж буй С.Наранцогтыг томилох саналыг УИХ-ын дарга Н.Учрал танилцуулсан байна. Томилгоог Эдийн засгийн байнгын хороо болон УИХ-ын чуулганы нэгдсэн хуралдаанаар хэлэлцэн батална. 

Монголбанкны одоогийн Ерөнхийлөгч Б.Лхагвасүрэнгийн бүрэн эрхийн хугацаа дуусаж байгаа юм.