Улсын хэмжээнд III улирлын байдлаар 382 тэрбум төгрөгийн үнийн дүн бүхий худалдаа, үйлчилгээний зориулалттай барилгын ажил хийгдэж байна. Худалдаа, үйлчилгээний барилгын ажил 31.9 хувиар өссөнөөр сүүлийн гурван жилд өсөлт эрс эрчимжсэнийг онцолж болохоор байгаа юм.

Харин үйлдвэрийн зориулалттай барилгын ажил 17.4 хувиар буурчээ. Ингэснээр сүүлийн гурван жил дараалан буурсан үзүүлэлттэй байна.

Оны эхний есөн сард барилга угсралт, их засварын ажил өмнөх оны мөн үеэс 28.9 хувиар өсөж, 8.8 их наяд төгрөг хүрснийг Үндэсний статистикийн хороо мэдээлсэн байна. Нийт барилга угсралт, их засварын ажлын 36.6 хувийг орон сууцны барилга, 29.5 хувийг орон сууцны бус барилга эзэлж байгаа аж.

Үүнээс гадна III улирлын байдлаар үл хөдлөх эд хөрөнгө борлуулах тусгай зөвшөөрөлтэй агент брокеруудын нийт худалдсан болон худалдан авсан үл хөдлөх хөрөнгийн ердөө нэг хувийг үйлдвэрийн зориулалттай барилга эзэлж буйг Санхүүгийн зохицуулах хорооны тайлангаас харж болохоор байна.