Мөнгөний нийлүүлэлт (М2) эргэн эрчимжиж эхэллээ. Аравдугаар сарын эцэст урьдчилсан гүйцэтгэлээр 45 их наяд төгрөг хүрч, өмнөх оны мөн үеэс 2.9 их наяд төгрөг буюу долоон хувиар өссөн байна. Үүнд төгрөгийн хадгаламж 3.2  их наяд төгрөгөөр буюу 15.4 хувиар өссөн нь голлон нөлөөлжээ.

Өнгөрсөн оны эцсээс эхлэн инфляц эрчимжсэнээр бодлогын хүү нэмэгдэж, мөнгөний нийлүүлэлт зургаадугаар сард цар тахлаас хойших хамгийн сул өсөлтөө үзүүлсэн юм. Харин наймдугаар сараас хойш ийнхүү өсөлт бага багаар хурдассаар байна.

Есдүгээр сард боловсролтой холбоотой аяллын зардал өсөхтэй зэрэгцэн валютын харилцах данс дахь мөнгөний хэмжээ эрс буурчээ. Аравдугаар сард ч үргэлжлэн таван хувиар буурч, 4.6 их наяд төгрөг хүрсэн байна.

Харин нийт зээлийн үлдэгдэл 43.8 их наяд төгрөг хүрч,  өмнөх оны мөн үеэс 8.3 их наяд төгрөг  буюу 23.5 хувийн органик өсөлт үзүүллээ. Өмнөх сараас 733.6 тэрбум төгрөг буюу 1.7 хувиар өсжээ. Нийт зээлийн өрийн үлдэгдлийн 59.7 хувь нь иргэд, 38.7 хувь нь хувийн байгууллага, 0.6 хувь нь Төрийн байгууллага, 0.9 хувь нь санхүүгийн байгууллага болон бусад байгууллагынх байна.

III улиралд аж ахуйн нэгжийн зээлийн шалгуурын индекс бага зэрэг суларснаар тэдгээрт олгосон зээлийн хэмжээ хамгийн өндөр буюу 32.9 хувийн өсөлттэй байсан аж.

Харин зөвхөн барилгын салбарын зээлийн шалгуур болон нөхцөл зэрэг өсөж, тус салбарын жигнэсэн дундаж хүү хамгийн өндөр түвшинд байна. Цаашид энэ оны IV улиралд ч тухайн  салбарын шалгуур болон нөхцөл үргэлжлэн өсөх төсөөлөлтэй байгааг Монголбанк танилцуулсан юм.

Оны эцэст хүртэл аж ахуйн нэгж болон иргэдийн зээлийн эрэлт бага зэрэг нэмэгдэх төлөвтэй байгаа аж. Аж ахуйн нэгжүүдээс хөдөө аж ахуй болон худалдаа үйлчилгээний салбарын зээлийн эрэлт харьцангуй өндөр байхаар байна.