(Bloomberg) -- Японы шинэ Засгийн газар валютын зах зээлд хөндлөнгөөс оролцож иений ханшийг сэргээж чадна гэсэн хүлээлт арилжаанд оролцогчдын дунд улам буурч байна. Иений ханш аль хэдийн өмнө нь Японы эрх баригчдын интервенц хийж байсан түвшинд хүрч сулраад байгаа аж.

Өнгөрсөн онд тус улсын Төв банк бодлогын хүүг нэмэгдүүлэхээс өмнөхөн зах зээлд интервенц хийж байсан юм. Харин энэ удаад Японы шинэ Ерөнхий сайд бодлогын хүүг өсгөхөд яаравчлахгүй байх хэрэгтэй гэсэн мэдэгдэл хийлээ.

Санаэ Такайчигийн Засгийн газрын зардлыг нэмэгдүүлэх төлөвлөгөө нь иений ханш сулрахад нөлөөлж байна. Түүнчлэн Япон улс АНУ-д их хэмжээний хөрөнгө оруулалт хийх амлалт өгөөд буй нь Японы гадаад валютын нөөцийг шавхах эрсдэлтэй байгаа аж.

Харин БНСУ-ын воны ханш мөн 2009 оноос хойших доод түвшинд ойртлоо. Ингэснээр БНСУ-ын Төв банканд ханшийн уналт үргэлжлэхээс сэргийлэх арга хэмжээ авах шаардлага тулгарч байна.

Воны спот ханш одоогийн түвшнээс нэг хувиар сулрах юм бол 2009 оны гуравдугаар сараас хойших доод түвшнийг давах юм. БНСУ-ын Төв банкны Ерөнхийлөгч И Чан Юн “Хэт их хэлбэлзэл ажиглагдвал эрх баригчид хөндлөнгөөс оролцоход бэлэн байгаа” гэдгээ мэдэгдсэн байна.  Хэдий тийм боловч воны ханш Холбооны Нөөцийн банкны бодлого, худалдааны хурцадмал байдал зэрэг олон улсын тодорхойгүй байдалд "хэт мэдрэмтгий" байгааг онцолжээ.

Mia Glass, John Cheng, Susie Kang