2026 оны нэгдсэн төсвийн нийт тэнцвэржүүлсэн орлогыг 31.9 их наяд төгрөг буюу дотоодын нийт бүтээгдэхүүний 31.2 хувь, нийт зарлагыг 32.9 их наяд буюу дотоодын нийт бүтээгдэхүүний 32.2 хувьтай тэнцэхээр тооцож, баталлаа. Ингэснээр төсвийн тэнцвэржүүлсэн тэнцэл нэг их наяд 50 тэрбум төгрөг буюу дотоодын нийт бүтээгдэхүүний нэг хувьтай тэнцэх хэмжээний алдагдалтай байхаар байна.

Ирэх онд боловсролын салбарын багш, ажилтны үндсэн цалинг 76 хувиар нэмэгдүүлэх хүрээнд 520 тэрбум төгрөгийг нэмж тусгасан. Ингэснээр багш нарын үндсэн цалинг 2.8 сая төгрөг хүргэж, цаашид шат дараатай нэмэгдүүлж, 3.5 сая төгрөг хүргэхээр тохиролцоод байгаа юм.

Харин эмч нарын цалинг 15 хувиар нэмэгдүүлэхээр тооцоолж, Эрүүл мэндийн даатгалын санд 190 тэрбум төгрөг хуваарилсан. Үүн дээр нэмээд Эрүүл мэндийн даатгалын сангийн санхүүжилтээс 157 тэрбум төгрөг гаргаснаар эмч нарын цалинг ирэх оны нэгдүгээр сарын нэгэээс 30 хувиар, аравдугаар сарын нэгнээс 20 хувиар, арван хоёрдугаар сарын нэгнээс 25 хувиар нэмэхээр үйлдвэрчний эвлэлийн төлөөллүүдтэй урьдчилсан байдлаар тохиролцоод байна.

Мөн тэтгэвэр, тэтгэмжийг инфляцтай уялдуулан 8.6 хувиар,  хөгжлийн бэрхшээлтэй болон хөгжлийн бэрхшээлтэй хүүхдийн амьжиргааг дэмжих тэтгэмжийг тус бүр 20 хувиар нэмэхээр шийдвэрлэлээ.

Урсгал зардлыг дотоодын нийт бүтээгдэхүүний 24 хувиас хэтрүүлэхгүй байх хуулийн дагуу урсгал зардлыг нэг их наяд гаруй төгрөгөөр, хөрөнгийн зардлыг 361 тэрбум төгрөгөөр тус тус бууруулж, цалин тэтгэвэр нэмэх санхүүжилтийг шийдвэрлэсэн. Ингэхдээ төсвийн ерөнхийлөн захирагч нарын урсгал зардлыг 6-12.8 хувиар бууруулж, тэвчиж болох зардлуудыг хойшлуулсан. Мөн хөрөнгө оруулалтын зарим төслүүдийг хасаж, тоног төхөөрөмжийн зардлыг 50 хувиар бууруулах зэрэг зохицуулалт хийлээ.

Макро эдийн засгийн хувьд ирэх онд дотоодын нийт бүтээгдэхүүний бодит өсөлтийг 5.7 хувь, инфляцыг долоон хувьд тогтворжуулахаар тооцоолж байна.

Мөн экспортыг 16.7 тэрбум ам.доллар хүргэх зорилт дэвшүүлсэн. Нийт 90 сая тонн нүүрс, 1.9 сая тонн зэсийн баяжмал экспортолж, төсвийн нийт орлогын 27 орчим хувь буюу 9.3 их наяд төгрөгийг уул уурхайн салбараас бүрдүүлэхээр төлөвлөв.