Улсын хэмжээнд инфляцын түвшин аравдугаар сард эрчимжиж, 9.2 хувьтай гарлаа. Долоодугаар сараас хойш хэрэглээний үнийн индексийн өөрчлөлт Төв банкны зорилтод түвшнээс ийнхүү холдсоор өмнөх сараас 0.6 хувиар өссөн үзүүлэлттэй байна. Үүнд хүнсний бүлгийн индексийн өсөлт нэлээдгүй эрчимжиж, 11.6 хувиар өссөн нь гол нөлөө үзүүлжээ.

Инфляцын түвшин дэх оролцоог харвал долоодугаар сард хүнсний бараа, бүтээгдэхүүний үнийн өөрчлөлтийн оролцоо 22 хувьтай байсан бол сүүлд 34 хувь болж өссөн байна.

Харин гол дарамт болж байсан үйлчилгээний үнийн өөрчлөлт саарч, 14.7 хувьтай тэнцэж буй бөгөөд оны сүүлийн хоёр сард Төрөөс хамааралтай үйлчилгээний нөлөө арилах төлөвтэй байгааг Монголбанкны мөнгөний бодлогын сүүлийн хурлаараа танилцуулж байсан юм. 

Үүнээс гадна бусад гол бүлгүүдийн өөрчлөлтийг харвал хүнсний бус болон барааны үнийн өөрчлөлт харьцангуй нам, тогтвортой байна.

Төв банкнаас оны эхэнд инфляцыг барих зорилгоор бодлогын хүүг нэмэгдүүлж, үүнийг дагаад инфляцын түвшин аажмаар буурч байсан юм. Хэдий тийм боловч оны хоёрдугаар хагас эхэлснээс хойш ийнхүү эргээд аажмаар өссөөр байна.